Kryetari i Aleancës Kosovare të Bizneseve (AKB), Agim Shahini, ka deklaruar se e ardhmja ekonomike dhe strategjike e Kosovës është e lidhur ngushtë me marrëdhëniet me Shtetet e Bashkuara të Amerikës. Ai vlerësoi se ndërtimi dhe forcimi i shtetit është mundësuar nëpërmjet mbështetjes amerikane, ndaj çdo vendim madhor duhet të koordinohet me këtë aleat.
Në një qëndrim të publikuar, AKB vlerëson se asnjë qeveri e ardhshme nuk duhet të injorojë interesat strategjike që burojnë nga ky partneritet. Sipas AKB-së, kundërshtimi i projekteve që ndërlidhen me sigurinë energjetike dhe investimet amerikane, përfshirë projektin e gazit amerikan, është i dëmshëm për zhvillimin e vendit dhe proceset integruese euroatlantike.
Organizata thekson se ky orientim nuk është vetëm historik apo emocional, por paraqet një domosdoshmëri për tërheqjen e investimeve të huaja. AKB u ka bërë thirrje forcave politike në Kosovë që të forcojnë bashkëpunimin me aleatët ndërkombëtarë, duke theksuar se partneriteti me SHBA-në është garanci për qëndrueshmërinë dhe zhvillimin e vendit.