Bordi i Autoritetit të Komunikimeve Elektronike dhe Postare (AKEP) miratoi më 29 tetor 2026 ndryshime në kuadrin rregullator për mbrojtjen e konsumatorëve të telefonisë celulare. Në të njëjtën mbledhje, bordi autorizoi testimin e teknologjisë satelitore Direct-to-Device (D2D – IMT).
Sipas rregullores, kartat SIM do të kenë vlefshmëri 12-mujore, ndërsa kredia monetare do të ketë afat minimal prej 180 ditësh. Përdoruesit do të mund t’i rimbushin telefonat edhe me vlera të ulëta dhe të kërkojnë rimbursimin e kreditit monetar të papërdorur kur numri kalohet te një operator tjetër. Rregullat parashikojnë gjithashtu më shumë transparencë për tarifat dhe ruajtjen e numrit celular për të paktën 12 muaj pas çaktivizimit.
Ndryshimet për tarifat mujore do të zbatohen nga 1 janari 2027. Prej asaj date, operatorët nuk do të lejohen të përfshijnë në kontrata klauzola për rritjen automatike të tarifave në përqindje ose sipas indekseve të ndryshueshme, përfshirë Indeksin e Çmimeve të Konsumit (IÇK), kur vlera konkrete e tarifës së ardhshme nuk është përcaktuar në momentin e lidhjes së kontratës. Masat e tjera do të zbatohen sipas afateve të përcaktuara në rregullore.
AKEP autorizoi One Albania të kryejë një testim 120-ditor të teknologjisë D2D, në bashkëpunim me Starlink/SpaceX. Teknologjia mundëson lidhjen e drejtpërdrejtë të telefonave celularë të përshtatshëm me satelitët dhe synon zgjerimin e mbulimit në zona ku sinjali i rrjeteve tokësore është i kufizuar.