Bashkimi Evropian ka miratuar një paketë rregullash të reja për telefonat celularë, që hyjnë në fuqi gradualisht në tregun europian nga qershori 2025 deri në shkurt 2027.
Ndryshimi kryesor është bateria, e cila nga viti 2027 duhet të jetë e zëvendësueshme lehtë nga përdoruesit me mjete bazike, pa nevojë për shërbime profesionale. Kjo parandalon zëvendësimin e pajisjeve vetëm për shkak të dobësimit të baterisë dhe ul kostot për konsumatorët.
Rregullat parashikojnë që bateritë të ruajnë performancën për më gjatë, edhe pas shumë cikleve karikimi. Pajisjet duhet të projektohen për riparueshmëri më të lartë, duke lehtësuar hapjen dhe mirëmbajtjen. Kompanitë prodhuese detyrohen të mbajnë pjesë këmbimi të disponueshme për disa vite dhe të mos kufizojnë riparimet nga servise të pavarura.
Këto rregulla pritet të ndikojnë përtej Europës, pasi prodhuesit e mëdhenj si Apple dhe ata të sistemeve Android mund të përshtasin modelet globale. Për përdoruesit, përfitimet përfshijnë shpenzime më të ulëta dhe jetëgjatësi më të madhe të pajisjeve. Për mjedisin, synohet zvogëlimi i mbetjeve elektronike dhe nxitja e riparimit në vend të zëvendësimit.