Një aksident trafiku me pasoja fatale ka ndodhur mesditën e së dielës në autostradën "Ibrahim Rugova". Sipas njoftimit zyrtar nga Policia e Kosovës, vetura ka dalë nga rruga në drejtimin Malishevë-Prishtinë, rreth orës 12:40.
Zëdhënësja e Policisë, Arlinda Rexhepi, konfirmoi se si pasojë e përplasjes, një pasagjere ka ndërruar jetë në vendngjarje, ndërsa drejtuesi i mjetit, një shtetas kosovar, ka pësuar lëndime trupore. I lënduari është dërguar në Qendrën Klinike Universitare të Kosovës (QKUK) për të marrë ndihmën e nevojshme mjekësore. Me vendim të prokurorit, trupi i pajetë i viktimës është dërguar në Institutin e Mjekësisë Ligjore për t'iu nënshtruar autopsisë.
Lidhur me rastin, analisti dhe kandidati për deputet, Burim Ramadani, ka reaguar përmes rrjeteve sociale, duke kërkuar përgjegjësi nga institucionet për mirëmbajtjen e infrastrukturës rrugore. Autoritetet përkatëse janë duke vazhduar hetimet për të përcaktuar shkaqet e sakta të këtij vetaksidenti.
Përditësime
Autoritetet kanë konfirmuar se viktima e aksidentit fatal në autostradën "Ibrahim Rugova" është një 69-vjeçare. Ngjarja ka ndodhur në kilometrin e 52-të, ku mjeti është përplasur me mbrojtëset anësore. Për nxjerrjen e trupit nga automjeti u desh ndërhyrja e zjarrfikësve, ndërsa ekipet e emergjencës bllokuan përkohësisht njërin shirit të autostradës për të mundësuar operacionin.