Një aksident trafiku me fatalitet ka ndodhur pasditen e së shtunës në fshatin Jasiq të Junikut. Sipas konfirmimit nga zëdhënësi i Policisë së Kosovës për Rajonin e Pejës, Driton Rugova, ngjarja është regjistruar rreth orës 13:40.
Në këtë aksident është përfshirë një mjet tip katërçikletë. Për pasojë, drejtuesi i saj ka humbur jetën në vendin e ngjarjes, vdekja e të cilit është konstatuar nga ekipi mjekësor i pranishëm. Viktima është identifikuar si Shkëlqim Alaj, nga Drenoci i Vokshit në Komunën e Deçanit.
Në vendin e ngjarjes kanë dalë njësitet përkatëse policore dhe prokurori i shtetit. Me urdhër të prokurorit, trupi i pajetë i viktimës është dërguar në Institutin e Mjekësisë Ligjore në Prishtinë për të kryer obduksionin. Autoritetet kanë nisur hetimet për të zbardhur rrethanat dhe shkaqet që çuan deri te ky aksident.