Një aksident i rëndë rrugor u regjistrua në afërsi të Qendrës Tregtare Univers (QTU) në Tiranë, rreth orës 02:00 pas mesnatës.
Sipas informacioneve paraprake, një automjet u godit nga pas nga një tjetër mjet. Si pasojë e përplasjes së fortë, makina që shkaktoi aksidentin u përfshi nga flakët dhe u djeg plotësisht.
Në vendngjarje mbërritën menjëherë dy autoambulanca dhe një mjet zjarrfikës, të cilët neutralizuan flakët dhe ofruan ndihmën e parë.
Ende nuk dihet numri i personave në automjete as gjendja e tyre shëndetësore.
Policia ka mbërritur në vendngjarje dhe ka nisur hetimet për zbardhjen e shkaqeve.
Ngjarja shkaktoi një radhë 4 kilometra automjetesh.