Një përplasje masive rrugore ka ndodhur të enjten në autostradën I-95 në Karolinën e Jugut, SHBA, ku mjegulla e dendur shkaktoi një aksident zinxhir në një urë që lidh qarqet Clarendon dhe Orangeburg mbi Liqenin Marion. Në ngjarje u përfshinë gjithsej 69 automjete, mes të cilave 15 kamionë dhe 54 vetura. Bilanci i të plagosurve në gjendje të rëndë ka shkuar në 2 persona, ndërsa ekipet e shpëtimit vijojnë të jenë në gatishmëri.
Sipas raportimeve, ekipet e emergjencës dhe Departamenti i Zjarrfikësve ndërhynë për të nxjerrë katër persona që kishin mbetur të bllokuar brenda automjeteve. Ndonëse nuk raportohen viktima, të paktën një person është transportuar në spital me helikopter, ndërsa të tjerë kanë marrë dëmtime dhe ndodhen nën kujdesin mjekësor. Sipas dëshmitarit Noah Mandel, skena ishte mjaft e rrezikshme për shkak të një automjeti që shpërtheu në flakë, por ai e konsideroi fat faktin që asnjë makinë nuk përfundoi në ujë.
Patrulla e Autostradave të Karolinës së Jugut dhe Departamenti i Transportit njoftuan se zona ishte paralajmëruar më herët për dukshmëri të ulët. Autostrada mbeti e bllokuar për disa orë gjatë punës së ekipeve të shpëtimit, ndërsa qarkullimi është rikthyer në normalitet pas ndërhyrjeve të autoriteteve.
Përditësime
Autoritetet mjekësore konfirmuan se numri i të plagosurve në gjendje të rëndë nga aksidenti masiv në Karolinën e Jugut ka shkuar në 2 persona.