Një aksident i rëndë rrugor ka ndodhur në autostradën ndërshtetërore I-95 në shtetin amerikan të Virxhinias, në afërsi të zonës së Quanticos, në qarkun Stafford. Ngjarja u shënua rreth orës 02:35 të mëngjesit, kur një autobus është përplasur me 6 automjete të tjera që ndodheshin në trafik.
Sipas Policisë Shtetërore të Virxhinias, aksidenti ka ndodhur në një segment ku trafiku ishte ngadalësuar për shkak të punimeve në rrugë. Hetimet paraprake tregojnë se drejtuesi i autobusit nuk ka arritur të reduktojë shpejtësinë në kohë, duke shkaktuar përplasjen zinxhir. Si pasojë, 5 persona që udhëtonin në automjetet e përfshira kanë humbur jetën në vendngjarje. Viktimat ishin të moshës nga 7 deri në 45 vjeç.
Të dhënat zyrtare konfirmojnë se të paktën 34 persona janë dërguar në spitale për ndihmë mjekësore. Zëdhënësi i policisë, Matthew Demline, ka konfirmuar se tre prej të plagosurve ndodhen në gjendje kritike. Mes të lënduarve raportohet të jetë edhe drejtuesi i autobusit, një 48-vjeçar.
Autoritetet theksojnë se viktimat ishin pasagjerë në makinat e goditura dhe jo në autobus. Për shkak të përplasjes, korsitë në drejtim të jugut të autostradës qëndruan të mbyllura për rreth 7 orë, duke sjellë devijimin e qarkullimit në rrugë alternative deri në rihapjen e plotë. Policia po heton rrethanat e plota të aksidentit dhe nuk ka përjashtuar mundësinë e ngritjes së akuzave penale ndaj përgjegjësve.
Përditësime
Autoritetet në Virxhinia po shqyrtojnë ngritjen e akuzave ndaj drejtuesit të autobusit, identiteti i të cilit mbetet i paidentifikuar. Policia ka publikuar pamjet e aksidentit të së premtes, ku automjeti shihet i dalë nga rruga dhe i përplasur me gjashtë mjete të tjera. Hetimet për shkaqet e incidentit janë në zhvillim e sipër.