Dy persona kanë mbetur të lënduar si pasojë e një aksidenti rrugor të ndodhur ditën e sotme në fshatin Rakosh të komunës së Istogut. Në aksident u përfshinë dy vetura, të cilat për shkaqe ende të panjohura janë përplasur mes vete.
Zëdhënësi i Policisë së Kosovës për Rajonin e Pejës, Driton Rugova, ka konfirmuar rastin për Gazetën Sinjali. Ai bëri të ditur se të lënduarit janë dërguar menjëherë në Spitalin Rajonal të Pejës për të marrë ndihmën e nevojshme mjekësore.
Aktualisht, njësitë kompetente policore kanë nisur hetimet për të përcaktuar rrethanat dhe shkaqet që çuan deri te ky aksident trafiku. Deri në këto momente nuk janë dhënë detaje të mëtejshme mbi gjendjen shëndetësore të të lënduarve.
Përditësime
Zëdhënësi i Policisë së Kosovës, Fadil Gashi, ka korrigjuar detajet e aksidentit të ndodhur në orën 13:42. Ngjarja ka ndodhur në rrugën 'Fehmi Agani' në Istog dhe jo në fshatin Rakosh, siç u raportua fillimisht. Të lënduarit kanë pësuar lëndime të lehta dhe po marrin trajtim mjekësor në QKMF-në e Istogut, e jo në Spitalin Rajonal të Pejës.