Një aksident rrugor ka ndodhur në rrugën nacionale Lushnje-Berat, në afërsi të fshatit Çukas. Sipas informacioneve paraprake, një automjet tip Volkswagen është përplasur me barrierat mbrojtëse anësore dhe është përmbysur në rrugë, pasi është rrotulluar disa herë.
Nga ky aksident kanë mbetur të lënduar katër personat që udhëtonin në mjet. Ata janë dërguar me urgjencë në Spitalin e Lushnjes, ku bluzat e bardha konfirmuan se të lënduarit ndodhen jashtë rrezikut për jetën.
Në vendngjarje ka mbërritur shërbimi i ambulancës dhe efektivët e Policisë së Qarkullimit Rrugor. Policia po punon për zbardhjen e rrethanave të ngjarjes, ndërsa dyshimet paraprake lidhen me humbjen e kontrollit nga ana e drejtuesit të mjetit. Për shkak të përplasjes, trafiku në atë segment rrugor ka qenë i rënduar, ndërsa efektivët kanë marrë masa për disiplinimin e qarkullimit.