Një aksident rrugor është regjistruar ditën e sotme, me 21 gusht 2026, në vendin e njohur si “Pushimi i Shoferit” në aksin rrugor Lushnje-Fier. Përplasja ka ndodhur ndërmjet një automjeti tip “Volkswagen” dhe një furgoni që po transportonte udhëtarë në drejtim të jugut të vendit.
Sipas të dhënave paraprake, drejtuesi i furgonit ka ndërmarrë manovra për të shmangur përplasjen direkte me automjetin, duke devijuar trajektoren dhe për pasojë është përplasur me barrierat metalike anësore të autostradës. Si pasojë e përplasjes, disa udhëtarë që ndodheshin në furgon kanë pësuar lëndime. Prej tyre, 2 persona janë transportuar me ambulancë drejt spitalit për të marrë ndihmën e nevojshme mjekësore.
Shërbimet e Policisë kanë mbërritur në vendngjarje, ku po kryejnë veprimet hetimore për zbardhjen e plotë të shkaqeve dhe rrethanave të këtij aksidenti, si dhe po punojnë për disiplinimin e qarkullimit të mjeteve në këtë segment.
Kryqëzimi pranë zonës së “Pushimit të Shoferit” njihet si një pikë problematike në qarkullimin rrugor. Në raportimet e mediave vihet në dukje se ky segment rrugor shpesh shërben si burim aksidentesh dhe se deri më tani nuk ka pasur ndërhyrje apo përmirësime të dukshme të infrastrukturës nga ana e autoriteteve rrugore për të rritur sigurinë.