Një aksident i rëndë rrugor është regjistruar pasditen e së premtes në aksin e vjetër Fier–Vlorë, në vendin e njohur si Kthesa e Qarrit. Përplasja ka përfshirë një automjet tip BMW dhe një kamionçinë të ngarkuar me ushqim për bagëti.
Si pasojë e forcës së impaktit, kamionçina është përmbysur në rrugë. Nga ky aksident ka mbetur i plagosur pasagjeri që udhëtonte në kamionçinë, i cili është dërguar me autoambulancë drejt Spitalit Rajonal Fier për të marrë ndihmën e nevojshme mjekësore.
Në vendngjarje kanë mbërritur shërbimet e Policisë, të cilat kanë nisur veprimet hetimore për zbardhjen e shkaqeve dhe rrethanave të plota të përplasjes. Njëkohësisht, efektivët po punojnë për të normalizuar qarkullimin e automjeteve në këtë segment rrugor, ku për shkak të ngjarjes janë krijuar vështirësi të përkohshme në lëvizje.