Një aksident rrugor është regjistruar pasditen e së shtunës në unazën e qytetit të Fierit. Sipas informacioneve paraprake, një automjet tip BMW ka humbur kontrollin e drejtimit, duke dalë nga rruga dhe duke u përplasur me dy automjete të tjera që ishin të parkuara në anë të aksit rrugor.
Si pasojë e përplasjes së fortë, drejtuesi i BMW-së ka mbetur i plagosur. Ai është transportuar menjëherë me autoambulancë në Spitalin Rajonal të Fierit, ku po merr kujdesin e nevojshëm mjekësor.
Në vendin e ngjarjes kanë mbërritur shërbimet e Policisë së Fierit, të cilat kanë nisur verifikimet për të përcaktuar rrethanat dhe shkaqet që çuan në humbjen e kontrollit të mjetit. Autoritetet po punojnë gjithashtu për menaxhimin e trafikut dhe rikthimin e qarkullimit normal në segmentin ku ndodhi përplasja.