Mbrëmjen e mërkurës, në unazën lindore të Fierit, ndodhi një aksident rrugor. Një automjet u përpjek të largohet me shpejtësi, duke mos iu përgjigjur thirrjes së policisë për të ndaluar, dhe si pasojë u përplas me një automjet tjetër të parkuar.
Drejtuesi i mjetit u dëmtua në përplasje dhe u transportua menjëherë me urgjencë në Spitalin Rajonal Fier. Ai ndodhet nën kujdesin e mjekëve dhe është jashtë rrezikut për jetën.
Në vendngjarje mbërritën shpejt shërbimet e policisë, forcat zjarrfikëse dhe grupi hetimor. Këto shërbime po punojnë për zbardhjen e plotë të dinamikës së aksidentit.
Pas marrjes së ndihmës mjekësore, drejtuesi i automjetit do të shoqërohet në komisariat për veprime të mëtejshme hetimore.
Përditësime
Besmir Mustaj, 37-vjeçar nga Roskovec, u identifikua si drejtuesi i mjetit të përfshirë në aksident.