Një aksident rrugor është regjistruar pasditen e së hënës, më 31 gusht 2026, në bypass-in Mbrostar–Levan, në afërsi të mbikalimit të Spitalit Memorial të Fierit. Sipas informacioneve paraprake, automjeti tip Volkswagen ka humbur kontrollin dhe ka dalë nga rruga, duke përfunduar në kanal.
Nga ky aksident janë lënduar drejtuesi i automjetit, i identifikuar si Indrit Shyti, si dhe dy pasagjerët që udhëtonin me të. Të tre të dëmtuarit janë dërguar menjëherë për në Urgjencën e Spitalit Rajonal të Fierit për të marrë ndihmën e nevojshme mjekësore. Në vendngjarje kanë shkuar forcat e Qarkullimit Rrugor dhe ekspertët e kriminalistikës, të cilët kanë nisur hetimet për të përcaktuar shkaqet e daljes së mjetit nga rruga dhe për menaxhimin e trafikut në këtë aks rrugor.
Ndërsa burime të shumta raportojnë se drejtuesi i mjetit është në gjendje të rëndë shëndetësore dhe ndodhet në sallën e operacionit, media të tjera raportojnë se të përfshirët janë jashtë rrezikut për jetën.
Përditësime
Aksidenti ndodhi në orën 16:50 në aksin Mbrostar–Levan. Drejtuesi i mjetit, Indrit Shyti, ndodhet në sallën e operacionit për shkak të dëmtimeve të rënda. Si pasojë e përplasjes, në zonë është krijuar kolonë e gjatë automjetesh, ndërsa forcat e qarkullimit rrugor po punojnë për zhbllokimin e trafikut.
Burimet mjekësore pranë Spitalit Rajonal të Fierit konfirmuan zyrtarisht se tre personat e përfshirë në aksidentin e së hënës ndodhen jashtë rrezikut për jetën. Ekipet mjekësore njoftuan se gjendja shëndetësore e drejtuesit të mjetit, Indrit Shyti, dhe dy pasagjerëve është stabilizuar pas trajtimit të marrë në sallën e operacionit dhe urgjencë.