Një aksident rrugor u regjistrua këtë të mërkurë në autostradën Fier–Lushnjë, në zonën e rrethrrotullimit të Kolonjës, në kahun e lëvizjes drejt Lushnjës. Sipas të dhënave paraprake, një mjet tip fuoristradë është përplasur me forcë nga pas me një kamionçinë në hyrje të rrethrrotullimit.
Si pasojë e goditjes, dy personat që udhëtonin në fuoristradë kanë pësuar lëndime dhe janë transportuar me ambulancë drejt Spitalit të Lushnjës. Burimet spitalore konfirmojnë se të lënduarit ndodhen nën kujdesin e mjekëve dhe janë jashtë rrezikut për jetën.
Shërbimet e Policisë Rrugore kanë mbërritur në vendngjarje për të kryer veprimet procedurale. Nga hetimet paraprake, dyshohet se shkaku i përplasjes ka qenë shpejtësia e lartë me të cilën po lëvizte mjeti tip fuoristradë, duke bërë të pamundur shmangien e goditjes ndaj kamionçinës. Grupi hetimor vijon punën për dokumentimin e plotë të rrethanave të ngjarjes.