Një aksident rrugor me pasojë dy të plagosur ka ndodhur pasditen e kësaj të hëne në aksin rrugor Shupenzë-Ura e Topojanit, në vendin e quajtur Boçevë. Sipas raportimeve nga vendngjarja, një furgon është përplasur me një veturë, duke shkaktuar dëme të konsiderueshme materiale. Si pasojë e forcës së goditjes, njëri prej automjeteve ka mbetur i varur në një pemë.
Sipas informacioneve paraprake, të plagosurit janë drejtuesit e mjeteve, të cilët dyshohet se udhëtonin të vetëm. Pas njoftimit nga qytetarët, shërbimet e emergjencës dhe policia kanë mbërritur në vendin e ngjarjes për të ofruar ndihmën e parë dhe për të nisur hetimet lidhur me shkaqet e aksidentit.
Të dëmtuarit janë transportuar për trajtim të mëtejshëm mjekësor: njëri është dërguar me urgjencë drejt Spitalit të Traumës në Tiranë, ndërsa tjetri po merr trajtim në spitalin e Bulqizës. Policia e Shtetit vijon procedurat për zbardhjen e dinamikës së kësaj ngjarjeje.