Një aksident i rëndë rrugor u regjistrua këtë të diel, rreth orës 17:30, në vendin e quajtur "Kthesa e Viroit", në aksin rrugor Gjirokastër-Kakavijë. Përplasja ndodhi midis një kamioni me drejtues shtetasin E. K., 54 vjeç, banues në Gjirokastër, dhe një motomjeti të drejtuar nga një 34-vjeçar me shtetësi greke, i identifikuar si J. K.
Si pasojë e përplasjes, drejtuesi i motorit pësoi dëmtime të rënda. Burime nga vendngjarja raportojnë se ai ka humbur këmbën. Pas ndihmës së parë, i plagosuri u transportua me helikopter drejt Tiranës për trajtim më të specializuar, ku sipas autoriteteve, ndodhet jashtë rrezikut për jetën.
Sipas të dhënave paraprake nga grupi hetimor, dyshohet se ngjarja ndodhi pasi motomjeti hyri në korsinë ku po qarkullonte mjeti i rëndë. Drejtuesi i kamionit është shoqëruar në komisariat për veprime të mëtejshme procedurale. Grupi hetimor po vijon punën për zbardhjen e plotë të shkaqeve dhe dinamikës së aksidentit.