Pasditen e kësaj të diele, një aksident i rëndë rrugor është regjistruar në aksin Gjirokastër-Tepelenë, konkretisht në zonën e njohur si kthesa e Viroit. Si pasojë e përplasjes së një motoçiklete me një maune, drejtuesi i motomjetit, i identifikuar si shtetasi J.K., ka pësuar dëmtime fizike të rënda, duke humbur këmbën e majtë.
Sipas informacioneve paraprake të autoriteteve, dyshohet se shkak i këtij incidenti ka qenë hyrja e motoçikletës në korsinë ku po qarkullonte mjeti i tonazhit të rëndë. Menjëherë pas ngjarjes, shërbimet e emergjencës kanë mbërritur në vendin e ngjarjes dhe e kanë transportuar të plagosurin drejt Spitalit Rajonal të Gjirokastrës për trajtimin e nevojshëm mjekësor.
Grupi hetimor i policisë ndodhet në vendngjarje për të kryer veprimet procedurale dhe për të zbardhur rrethanat e plota të përplasjes.
Përditësime
Policia e Gjirokastrës ka identifikuar palët e përfshira në aksidentin në aksin Gjirokastër-Tepelenë. Në përplasje janë përfshirë shtetasi Jorland Koçi, drejtues i motoçikletës me targa greke EOK 435, dhe shtetasi Edlir Kore, drejtues i kamionit me targë AB236YG.