Një aksident trafiku mes dy veturave ka ndodhur pasditen e 19 shkurtit 2026 në fshatin Kçiq të Mitrovicës së Jugut, ku si pasojë gjashtë persona kanë pësuar lëndime trupore.
Të lënduarit kanë kërkuar ndihmë mjekësore në Spitalin e Përgjithshëm “Dr. Sami Haxhibeqiri” në Mitrovicë rreth orës 16:55. Zëdhënësi i spitalit, Shpend Fazliu, ka konfirmuar se pesë prej tyre po vazhdojnë trajtimin në këtë spital, ndërsa një fëmijë i lindur në 2019 në gjendje më të rënduar është transferuar për trajtim të mëtejshëm në Qendrën Klinike Universitare të Kosovës (QKUK).
Sipas Fazliut, për pesë të lënduarit e tjerë po kryhen ekzaminimet diagnostike dhe trajtimet e nevojshme nga stafi i Emergjencës.
Përditësime
Aksidenti në Kçiq të Mitrovicës ndodhi rreth orës 16:30 në rrugën nacionale Mitrovicë–Prishtinë, raporton KosovaPress.
Policia është në vendngjarje dhe po heton rrethanat, tha zëdhënësi Avni Zahiti për KosovaPress.