Një aksident i rëndë trafiku ndodhi pasditen e së hënës, rreth orës 15:20, në fshatin Shushicë të komunës së Istogut. Si pasojë e përplasjes, dy persona kanë humbur jetën, ndërsa katër të tjerë kanë pësuar lëndime trupore.
Sipas njoftimit zyrtar nga Spitali i Përgjithshëm në Pejë, në emergjencë është pranuar një paciente pa shenja jete, e cila kishte pësuar politraumë. Pavarësisht përpjekjeve të stafit mjekësor, është konstatuar vdekja e saj. Rreth orës 16:30, në të njëjtin spital janë pranuar katër personat e tjerë të përfshirë në aksident.
Një fëmijë, i cili ndodhet në gjendje të rëndë, është transferuar për trajtim të mëtejmë në Qendrën Klinike Universitare të Kosovës (QKUK). Drejtori i Klinikës Emergjente, Naser Syla, bëri të ditur se pacienti ka pësuar politraumë, hemorragji intrakraniale dhe frakturë të femurit. Fëmija është intubuar dhe ndodhet nën monitorim të vazhdueshëm mjekësor.
Sa i përket të lënduarve të tjerë:
• Një paciente është hospitalizuar në Repartin e Ortopedisë për shkak të një frakture në femur.
• Dy persona të tjerë, pas trajtimit mjekësor, janë liruar për trajtim ambulantor pasi lëndimet e tyre janë vlerësuar si të lehta.
Stafi mjekësor i Spitalit të Përgjithshëm në Pejë u ka shprehur ngushëllime familjeve të viktimave dhe ka uruar shërim sa më të shpejtë për të lënduarit.
Përditësime
Mjekët në Emergjencën e QKUK-së konfirmojnë se gjendja e fëmijës së lënduar në aksidentin tragjik në Istog mbetet e rëndë, por stabile. I mituri pritet të transferohet në Klinikën e Mjekimit Intensiv sapo parametrat e tij vitalë të jenë plotësisht të stabilizuar.