Një vetaksident i rëndë ka ndodhur sot rreth orës 04:55 në fshatin Dollc të Klinës. Sipas Policisë së Kosovës, një person ka humbur jetën dhe katër të tjerë janë lënduar.
Ekipi mjekësor ka konstatuar vdekjen në vendin e ngjarjes. Katër personat e lënduar janë dërguar në Spitalin e Përgjithshëm në Pejë për trajtim mjekësor dhe sipas mjekëve ata ndodhen jashtë rrezikut për jetë.
Spitali ka njoftuar se pas trajtimit një person është dërguar për trajtim të mëtejshëm në Qendrën Klinike Universitare të Kosovës (QKUK), një person po vazhdon trajtimin në spitalin e Pejës, ndërsa dy persona janë liruar për në shtëpi në gjendje stabile. Personi që humbi jetën nuk është sjellë në këtë spital.
Me urdhër të Prokurorit të Shtetit, trupi i pajetë i viktimës është dërguar në Institutin e Mjekësisë Ligjore në Prishtinë për obduksion. Burimet e mediave kanë bërë të ditur se familja e përfshirë është nga një fshat i komunës së Pejës.
Përditësime
Dy aksidente të tjera me fatalitet ndodhën të hënën në Kosovë, duke çuar totalin e viktimave në tre persona. Një 60-vjeçar humbi jetën në Koshare të Ferizajt, ndërsa një 74-vjeçar në Dobërllukë të Vushtrrisë.