Një vetaksident trafiku ka ndodhur mëngjesin e së premtes në fshatin Dollc të Klinës, ku një automjet ka dalë nga rruga dhe ka përfunduar nën mbikalim.
Sipas zëdhënësit të Policisë së Kosovës për Rajonin e Pejës, Driton Rugova, policia është njoftuar për ngjarjen rreth orës 07:40. Si pasojë e aksidentit, një person ka pësuar lëndime trupore dhe është dërguar në Spitalin Rajonal të Pejës për trajtim mjekësor.
Pamjet nga vendi i ngjarjes, të publikuara nga portali lokal Klina Info, tregojnë se automjeti ka pësuar dëme të konsiderueshme materiale dhe është përmbysur pas daljes nga rruga. Autoritetet policore po hetojnë rrethanat dhe shkaqet që çuan deri te ky incident rrugor.