Mesditën e së enjtes, një automjet tip Benz ka humbur kontrollin në aksin rrugor Krutje–Pushimi i Shoferit, duke përfunduar i përmbysur në një kanal kullues me ujë. Në automjet udhëtonin një shtetas dhe djali i tij i mitur, të cilët mbetën të bllokuar për disa çaste.
Ndërhyrja e menjëhershme e dy djemve të zonës, të cilët hynë në kanal dhe thyen xhamat e mjetit, bëri të mundur nxjerrjen e tyre në kohë. Pas njoftimit, në vendngjarje mbërritën shërbimet e Policisë, forcat zjarrfikëse dhe autoambulancat, të cilat transportuan personat në spitalin e Lushnjës për ekzaminime mjekësore.
Banorët e zonës kanë ngritur shqetësimin se ky aks rrugor është bërë burim aksidentesh të shpeshta për shkak të mungesës së bordurave mbrojtëse në urën që kalon mbi kanal. Ata theksojnë se për këtë problematikë janë dorëzuar ankesa të vazhdueshme pranë autoriteteve përgjegjëse. Policia e qarkullimit rrugor po vijon dokumentimin e rrethanave të ngjarjes, e cila fatmirësisht nuk pati pasoja në jetë njerëzish.