Një automjet tip Benz ka goditur nga pas një motoçikletë në aksin rrugor Lushnjë-Berat, në drejtim të Beratit. Si pasojë e përplasjes, drejtuesi i motoçikletës, një shtetas i huaj 35-vjeçar, ka marrë lëndime dhe është transportuar me ambulancë në spitalin e Lushnjës, ku ndodhet nën kujdesin e mjekëve dhe jashtë rrezikut për jetën.
Policia e qarkullimit ka mbërritur në vendngjarje dhe ka filluar veprimet për zbardhjen e rrethanave të aksidentit. Sipas të dhënave paraprake, dyshohet se drejtuesi i motoçikletës ka humbur kontrollin e mjetit dhe më pas është goditur nga pas nga automjeti tip Benz.
Ekspertiza shkencore do të përcaktojë shkaqet e plota të aksidentit. Aksi rrugor Lushnjë-Berat njihet për trafik të rënduar dhe korridor me një korsi për çdo drejtim, gjë që ka shkaktuar aksidente të shumta në të kaluarën.
Përditësime
Policia e Shtetit konfirmoi se aksidenti ndodhi në dalje të Fier Sheganit.