Një aksident në vendin e punës ka ndodhur këtë të hënë në zonën e Limionit, në lagjen nr. 4 të qytetit të Sarandës. Shtetasi Besnik Lika, 44 vjeç, është rrëzuar nga soleta e një objekti teksa po kryente punime për riparimin e çatisë.
Pas marrjes së ndihmës së parë në urgjencën e Spitalit të Sarandës, mjekët konstatuan se i plagosuri ka pësuar frakturë torakale, me pasojë paralizën e gjymtyrëve të poshtme. Për shkak të gjendjes së rëndë shëndetësore, është vendosur transportimi i tij me helikopter drejt Spitalit të Traumës në Tiranë për trajtim të specializuar mjekësor.
Grupi hetimor i Policisë ndodhet në vendngjarje dhe po kryen veprimet e nevojshme për sqarimin e rrethanave dhe shkaqeve të këtij aksidenti.
Përditësime
Mjekët në Spitalin Rajonal të Sarandës konfirmuan se 44-vjeçari nga Saranda ka pësuar një frakturë torakale të vertebrës së tetë (T8). Pacienti ndodhet nën kujdesin intensiv të personelit mjekësor pas rrëzimit nga soleta.