Një shtetas grek, 48-vjeç, i identifikuar si Pavllos Simeriontaqis nga Athina, u dërgua i pajetë në urgjencën e Spitalit të Sarandës mbrëmjen e djeshme rreth orës 22:00.
Sipas burimeve, ai u soll në spital nga disa persona me një makinë të bardhë me targa greke, të cilët u larguan menjëherë pas kësaj. Pas mbërritjes në spital u njoftua policia, e cila ka nisur veprimet procedurale për sqarimin e rrethanave të ngjarjes.
Në trupin e viktimës nuk janë konstatuar shenja dhune. Dyshimet paraprake drejtohen nga një arrest kardiak si shkak i mundshëm i vdekjes. Policia po shqyrton kamerat e sigurisë për identifikimin e mjetit dhe personave të përfshirë.
Ende nuk dihen arsyet e pranisë së Pavllos Simeriontaqis në Sarandë. Trupi i tij do të transportohet në Institutin e Mjekësisë Ligjore në Tiranë për t’i nënshtruar ekspertizës dhe për të përcaktuar shkakun e saktë të vdekjes.
Përditësime
48-vjeçari grek ndodhej në Shqipëri për tregti sendesh kuzhine me një grup nga komuniteti rom. Ditët e fundit, ata ishin në Fier dhe Konispol, duke planifikuar largim nëpërmjet Qafë Botës. Para nisjes, ai u ndie keq papritur. Shokët e gjetën, njoftuan policinë dhe dhanë dëshmi. Viktima vuante prej vitesh nga diabeti; dyshohet për shkaqe natyrale, sipas burimeve policore.