Një ngjarje e rëndë është shënuar mbrëmjen e së dielës në plazhin e Pishporos, në Fier, ku një shtetas 49-vjeçar ka ndërruar jetë. Viktima është identifikuar si Durim Dogani, banues në Patos.
Sipas informacioneve paraprake nga autoritetet, ngjarja ka ndodhur teksa viktima ndodhej në kontakt me ujin. Dyshohet se 49-vjeçari ka shfaqur probleme të papritura shëndetësore, duke pësuar arrest kardiak menjëherë pasi është futur në det.
Në vendin e ngjarjes kanë mbërritur menjëherë shërbimet e Policisë dhe ekipet e ambulancës, të cilat kanë bërë të mundur transportimin e tij drejt Spitalit Rajonal të Fierit. Pavarësisht përpjekjeve të personelit mjekësor për t'i dhënë ndihmën e nevojshme, shtetasi nuk ka mundur të mbijetojë.
Policia po kryen veprimet e nevojshme procedurale për të dokumentuar rrethanat e plota të kësaj ngjarjeje. Gjithashtu, pritet që ekspertiza mjeko-ligjore të përcaktojë shkakun përfundimtar të vdekjes.