Policia e Durrësit zbardhi rrethanat e vdekjes së Saimir Markja, 59 vjeç, ngjarje e cila fillimisht u raportua si humbje jete nga atak kardiak.
Specialistët për hetimin e krimeve ndaj personit në Drejtorinë Vendore të Policisë Durrës, pas dyshimeve të krijuara, kryen veprime intensive hetimore nën drejtimin e Prokurorisë së Durrësit për të përcaktuar shkakun e saktë të vdekjes.
Nga hetimet rezultoi se më 13 prill 2026, në lagjen nr. 18 të Durrësit, Gentian Kraja, 42 vjeç, u konfliktua për motive të dobëta me Saimir Markja. Gjatë konfliktit, i dyshuari goditi me grushte 59-vjeçarin, i cili humbi ndjenjat, u rrëzua në asfalt dhe më pas ndërroi jetë nga dëmtimet e marra.
Fillimisht rasti u konsiderua si vdekje nga shkaqe natyrale, por veprimet hetimore përjashtuan këtë pistë dhe çuan në konfirmimin e natyrës kriminale.
Në përfundim të veprimeve, Gentian Kraja u vu në pranga për veprën penale vrasja nga pakujdesia. Hetimet vijojnë nën drejtimin e Prokurorisë së Durrësit, ndërsa materialet procedurale i janë referuar për veprime të mëtejshme.
Përditësime
Gentian Kraja dhe Saimir Markja janë fqinjë në të njëjtin pallat në Durrës. Konflikti shpërtheu për pompën e ujit, pasi Kraja e akuzoi Markjën se nuk kishte paguar 2000 lekë, si fqinjët e tjerë. Kraja e goditi disa herë me grushte Markjën në oborrin e pallatit dhe u largua. Në dëshminë para policisë, ai pretendoi se nuk e dinte se e kishte vrarë fqinjin.