L. D., i njohur si Landi Puja ose Land Derjaj, 48 vjeç, banues në lagjen nr. 3 të Kavajës, u arrestua nga shërbimet e Policisë pas disa orësh kërkimesh intensive. Ai dyshohet se më 21.02.2026, rreth orës 14:22, goditi disa herë me thikë S. V.-në, të njohur si Skënder Vrapi, Alket Isufi ose Skerdilajd Isufi, po 48 vjeç, gjatë një konflikti për motive të dobëta në të njëjtën lagje.
Sipas njoftimeve zyrtare të Policisë, konflikti shpërtheu sepse viktima kishte parkuar automjetin para banesës së autorit të dyshuar. Ky i fundit doli jashtë, i kërkoi largimin e makinës, çka çoi në debat verbal. Gjatë përplasjes, autori nxori një mjet prerës dhe goditi viktimën në zonën e zemrës. Viktima u dërgua në spital, por ndërroi jetë nga plagët e marra.
Pas ngjarjes, autori u largua nga vendi, por u lokalizua dhe u kap nga shërbimet e Komisariatit të Policisë Kavajë, Forcat e Posaçme 'Shqiponjat' dhe Forcat Operacionale të DVP Durrës. Gjatë veprimeve hetimore, grupi hetimor gjeti dhe sekuestroi thikën si provë materiale.
Hetimet vijojnë nën drejtimin e Prokurorisë së Durrësit për sqarimin e plotë të rrethanave. Materialet procedurale i janë referuar kësaj prokurorie për veprime të mëtejshme.