Pas hetimeve intensive të kryera nga grupi i posaçëm hetimor, nën drejtimin e Prokurorisë, autoritetet e Drejtorisë Vendore të Policisë Lezhë dhe Komisariatit të Policisë Kurbin kanë identifikuar autorin e dyshuar të ngjarjes së rëndë të ndodhur në Kurbin. Viktima, 40-vjeçari Ilir Lika (alias Gjini, Kokaj, Nure), u ekzekutua me armë zjarri sapo kishte zbritur nga automjeti për të hyrë në banesën e tij.
Sipas njoftimit zyrtar, autori i dyshuar është shtetasi Emiljan (Artur) Suti, 40 vjeç, banues në Laç. Policia bën me dije se i dyshuari ka precedentë të theksuar penalë, duke përfshirë një dënim me 5 vite burgim për veprën penale "Kanosja për shkak të detyrës", precedentë për armëmbajtje pa leje, si dhe një arrestim të mëparshëm në Belgjikë për vjedhje.
Grupi hetimor po shqyrton disa pista për motivet e krimit, ku ndër kryesoret dyshohet se janë konfliktet e vjetra që viktima ka pasur gjatë qëndrimit jashtë vendit. Në kuadër të veprimeve procedurale, janë shoqëruar në komisariat për verifikim nëna dhe vëllai i të dyshuarit. Ndërkaq, forca të shumta policore, përfshirë shërbimet e Forcës Kombëtare të Sigurisë, Njësia Shkodër, vijojnë kontrollet në terren për lokalizimin dhe arrestimin e të dyshuarit.