Autoritetet policore të Malit të Zi, në bashkëpunim me Policinë e Shtetit, kanë lokalizuar dhe prangosur në Ulqin 40-vjeçarin Besnik Kolndreu. Pas arrestimit, shtetasi u deportua drejt Shqipërisë përmes Pikës së Kalimit Kufitar Muriqan, ku iu dorëzua forcave të Drejtorisë Vendore të Policisë Lezhë.
Ndaj Kolndreut ishte vendosur më parë masa e sigurisë "Arrest në burg" nga Gjykata e Lezhës. Sipas hetimeve, i ndaluari dyshohet se ka ndihmuar autorët e vrasjes së dyfishtë të ndodhur në Balldren më 26 prill 2026, duke fshehur në banesën e tij në fshatin Torovicë automjetin e përdorur nga autorët pas krimit. Automjeti është sekuestruar nga shërbimet policore si provë materiale.
Ngjarja për të cilën hetohet 40-vjeçari ndodhi në prill, kur bashkëshortët Kreshnik dhe Gentiana Mujeci u qëlluan për vdekje me armë zjarri. Në lidhje me këtë krim, autoritetet kanë identifikuar si autorë të dyshuar shtetasit Renato Mhillaj, Adriano Mhillaj dhe Florin Mhillaj, të cilët vijojnë të mbeten në kërkim. Sipas të dhënave hetimore, motivi i këtij atentati dyshohet të ketë qenë hakmarrja për një vrasje të ndodhur dhjetë vite më parë. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Lezhë për hetime të mëtejshme.
Përditësime
Hetimet për vrasjen e Kreshnik Mujecit kanë zbardhur dinamikën e krimit. Autorët i kanë prerë rrugën viktimës, duke qëlluar me rreth 30 plumba nga një automjet pa targa. Mujeci ishte subjekt i një procesi të gjatë gjyqësor për vrasjen e Genc Mhillajt në vitin 2016. Pas shpalljes së pafajësisë nga shkallët më të ulëta, Gjykata e Lartë kishte vendosur rikthimin e çështjes për rigjykim në vitin 2024.