Specialistët për Hetimin e Krimit në Komisariatin e Policisë Lezhë, nën drejtimin e Prokurorisë së Lezhës, kanë zbardhur dinamikën e ngjarjes së ndodhur në fshatin Balldren i Vjetër. Pas veprimeve hetimore, është bërë arrestimi në flagrancë i shtetasit Astrit Avdiaj, 55 vjeç, banues në Tiranë.
Në vijim të hetimeve, forcat e rendit kanë identifikuar dhe shpallur në kërkim bashkëpunëtorin e tij, shtetasin Ermal Zalla, 35 vjeç, banues në Krujë. Autoritetet po vijojnë punën për lokalizimin dhe kapjen e tij, ndërsa po punohet për të sqaruar motivet e këtij veprimi.
Referuar të dhënave nga grupi hetimor, shpërthimi nuk ka shkaktuar dëme në njerëz apo pasuri. Në lidhje me Ermal Zalla, raportohet se ai është një emër i njohur për organet e rendit, për shkak të një arrestimi të mëparshëm në vitin 2020, kur atij iu sekuestrua një armë zjarri me silenciator dhe pajisje që dyshohet se shërbenin për shpërthime në distancë.
Ndërkohë, burimet zyrtare konfirmojnë se toka ku u vendos lënda plasëse është në pronësi të një qytetari, duke hedhur poshtë raportimet fillestare se ajo i përkiste biznesmenit të ndjerë Ardian Nikulaj. Materialet procedurale i janë përcjellë Prokurorisë për veprime të mëtejshme penale.
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë.