Operacioni policor i koduar “Unaza” çoi në vënien në pranga të shtetasit Arben Mhillaj, 41 vjeç, banues në fshatin Malecaj-Torovicë. Ndërhyrja u organizua nga strukturat për hetimin e krimeve të DVP Lezhë, në bashkëpunim me Forcën e Posaçme “Shqiponja” dhe shërbimet e Komisariatit të Policisë Lezhë, bazuar në informacionet për një person që qarkullonte i armatosur.
Sipas autoriteteve, i arrestuari u lokalizua fillimisht në fshatin Torovicë duke lëvizur me një automjet të blinduar. Pasi punonjësit e policisë i dhanë shenjë për të ndaluar, ai nuk iu bind urdhrit dhe tentoi të largohej me shpejtësi. Pas disa minutash ndjekjeje, shërbimet e policisë arritën ta ndalojnë dhe ta arrestojnë në fshatin Malecaj.
Në cilësinë e provës materiale u sekuestruan automjeti i blinduar, si dhe një armë zjarri pistoletë me fishek në fole dhe krehri me municion, të cilat i arrestuari dyshohet se i hodhi gjatë ndjekjes. 41-vjeçari rezulton me precedentë të mëparshëm penalë për kanosje dhe kundërshtim të punonjësve të policisë.
Nga verifikimet e kryera rezultoi se Arben Mhillaj është vëllai i shtetasit Florin Mhillaj, 36 vjeç, i cili është shpallur në kërkim për ngjarjen e datës 26 prill 2026 në rrugën “Balldren-Torovicë”. Florin Mhillaj dyshohet për veprat penale “Vrasja në rrethana të tjera cilësuese, kundër dy personave, e kryer në bashkëpunim” dhe “Mbajtja pa leje dhe prodhimi i armëve, armëve shpërthyese dhe i municionit”, për vrasjen e çiftit Kreshnik dhe Gentjana Mujeci. Materialet procedurale i kanë kaluar Prokurorisë pranë Gjykatës së Shkallës së Parë të Juridiksionit të Përgjithshëm Lezhë për hetime të mëtejshme.
Përditësime
Hetuesit po marrin në pyetje Arben Mhillajn, i cili deri më tani refuzon bashkëpunimin lidhur me dyshimet se po planifikonte një tjetër ekzekutim. Burime policore konfirmojnë se konflikti mes familjeve Mhillaj dhe Mujeci daton një dekadë më parë, pas një përplasjeje për bllokim rruge që çoi në vrasjen e Genc Mhillajt. Veç Florin Mhillajt, autoritetet po hetojnë përfshirjen e Renato Mhillajt dhe Adriano Mhillajt si bashkëpunëtorë në vrasjen e çiftit Kreshnik dhe Gentjana Mujeci.