Gjykata e Lezhës ka lënë në fuqi masën e sigurisë "Arrest në burg" për 40-vjeçarin Besnik Koldreu, i cili akuzohet për ndihmën e dhënë autorëve të vrasjes së bashkëshortëve Kreshnik dhe Gentjana Mujeci. Ngjarja ndodhi më 26 prill në fshatin Balldren, ku çifti u ekzekutua me rreth 30 plumba teksa po udhëtonin me automjet.
Në seancën e zhvilluar me dyer të mbyllura, Koldreu ka mohuar përfshirjen në krim. Ai deklaroi para trupit gjykues se jeton dhe punon në Mal të Zi dhe se nuk ka pasur dijeni që automjeti i përdorur nga autorët ishte fshehur pranë banesës së prindërve të tij në zonën e Torovicës. Pavarësisht pretendimeve të tij, gjykata pranoi kërkesën e Prokurorisë, duke e konsideruar të bazuar akuzën për "përkrahje të autorit të krimit", të kryer në bashkëpunim.
Besnik Koldreu u ndalua nga autoritetet malazeze në Ulqin më 17 qershor, pas shpalljes në kërkim ndërkombëtar nga pala shqiptare. Ndërkohë, policia vazhdon kërkimet për tre persona të tjerë të dyshuar si autorë të drejtpërdrejtë të vrasjes: Renato Mhillaj, Florin Mhillaj dhe Adriano Mhillaj.
Sipas hetimeve paraprake, pista kryesore e këtij atentati është hakmarrja. Viktima, Kreshnik Mujeci, ishte akuzuar më parë për vrasjen e Genc Mhillajt në vitin 2016, ngjarje për të cilën ai nuk kishte marrë një dënim gjyqësor.