Policia e Lezhës ka zbuluar dhe sekuestruar automjetin tip Volkswagen Polo pa targa, të përdorur nga autorët për t’i prerë rrugën dhe qëlluar drejt makinës së çiftit Kreshnik Mujeci dhe Gentjana Mujeci, të vrarë më 26 prill 2026 në fshatin Balldren.
Automjeti u gjet i mbuluar me bar në banesën e shtetasit Besnik Kolndreu, 22 vjeç, në fshatin Torovicë. Gjatë kontrollit në brendësi të tij, grupi hetimor sekuestroi 2 gëzhoja model 56. Nga këqyrja rezultoi se makina kishte xhamin e pasmë dhe trekëndëshat anësorë të dyerve të dëmtuar. Në oborrin e banesës u gjet një automjet tjetër identik, në pronësi të Besnik Kolndreut, por me targa të rregullta. Gjithashtu u sekuestruan veshjet e dyshuara si të përdorura nga autorët dhe një palë targa.
Nga hetimet rezulton se F. Mhillaj mori automjetin me qira në Rinas nëpërmjet motrës së tij, i hoqi targat dhe, në bashkëpunim me një person tjetër të shpallur në kërkim, e përdori për vrasje. Pas ngjarjes, ai e çoi makinën në banesën e Besnik Kolndreut për ta fshehur dhe krijuar alibi, duke shfrytëzuar ngjashmërinë me automjetin e pronarit.
Policia e shpalli në kërkim Besnik Kolndreut për veprat penale "Vrasja në rrethana të tjera cilësuese" dhe "Mbajtja pa leje dhe prodhimi i armëve, armëve shpërthyese dhe i municionit". Materialet u referuan në Prokurorinë e Lezhës për babanë e tij, N. Kolndreu, 79 vjeç, për veprën "Mbajtja pa leje dhe prodhimi i armëve, armëve shpërthyese dhe i municionit".
Hetimet tregojnë se vrasja lidhet me motive hakmarrjeje, në vazhdimësi të vrasjes së Genc Mhilljat në Shkodër më 2017, ku dyshohet përfshirja e njërit nga viktimat. Policia vijon kërkimet për kapjen e katër personave të shpallur në kërkim, përfshirë R. Mhillaj, djalin e Genc Mhilljat.
Përditësime
Policia e Lezhës zbuloi një Audi A4 në Torovicë, në një rrugë dytësore pranë një arë dhe një kanali. Ky automjet u përdor nga bashkautorët vëzhgues.
Brenda Audi A4-së u gjetën dokumente, kaska motori dhe portofolë që u përkasin autorëve në kërkim.
Policia e sekuestroi për ekspertiza kriminalistike dhe konfirmoi gjetjen e VW Polo-s ditën e mëparshme.
Policia e Lezhës ka identifikuar dyshuarit në kërkim: Adriano Mhillaj (22 vjeç), Florin Mhillaj (36 vjeç) dhe Renato Mhillaj (23 vjeç).
Kamerat e sigurisë në Balldren fiksuan sulmin.
Viktimat ktheheshin nga një drekë në Lezhë drejt banesës në fshatin Koljakaj.
Autorët përdorën dy automjete dhe ishin të pamaskuar.