Policia ka gjetur një nga mjetet e përdorura në vrasjen e çiftit Kreshnik Mujeci dhe Gentjana Mujeci. Ngjarja ndodhi mesditën e së dielës, rreth orës 14:50, në dalje të fshatit Balldren të Lezhës, në rrugën Balldren-Torovicë. Të dy humbën jetën në vend nga breshëria e plumbave të qëlluar drejt makinës së tyre.
Kamerat e sigurisë kanë regjistruar lëvizjet e çiftit që nga dalja nga banesa në Torovicë, drejt Lezhës, ku u ndaluan për kafe në një lokal në dalje të qytetit. Dy makina pa targa, një Audi A4 dhe një Golf 5, i kanë ndjekur ata. Pas kalimit të një makine policie, Golf 5 u largua drejt Balldrenit për të pritur, ndërsa Audi A4 vazhdoi ndjekjen deri në atentat.
Të dyshuarit dhe lidhja me ngjarje të mëparshme
Grupi hetimor ka identifikuar tre të dyshuar: Florin Mhillaj (36 vjeç), Renato Mhillaj (23 vjeç) dhe Adriano Mhillaj (22 vjeç), të cilët janë shpallur në kërkim. Adriano Mhillaj kishte precedent penal dhe kërkohej që prej janarit 2026 për kanosje me armë dhe armëmbajtje pa leje në Shkodër, në konflikt me Eduard Kësallën. Hetuesit dyshojnë se e njëjta Audi A4 u përdor në të dy ngjarjet.
Mjeti Golf 5 u gjet i fshehur në zonën e Torovicës. Policia ka ushtruar kontrolle në banesa në Torovicë, Malecaj dhe Balldren, duke marrë në pyetje disa persona.
Motivi i dyshuar
Pista kryesore është hakmarrja për vrasjen e Genc Mhillajt në 2016 në Torovicë, pas një sherri banal me përplasje fizike. Kreshnik Mujeci dhe vëllai i tij Lin Mujeci u arrestuan si të dyshuar, por u shpallën të pafajshëm nga Gjykata e Shkallës së Parë në Shkodër në 2018. Vendimi u konfirmua nga Apeli në 2019, ndërsa Gjykata e Lartë urdhëroi rigjykim në tetor 2024.
Përditësime
Policia e Shtetit publikoi fotot e dy të dyshuarve kryesorë në vrasjen e çiftit Mujeci: Florin Mhillaj dhe Renato Mhillaj.
Zhvillime të tjera:
- Ceremonia mortore zhvillohet nesër në Mali Kolaj.
- Çifti la pas katër fëmijë të mitur.
- Ngjarja zgjati pak më shumë se një minutë; autorët vepruan pa maska, me gjakftohtësi dhe në pritë të mirëplanifikuar.
- Renato Mhillaj është djali i Genc Mhillajt, ndërsa Adriano dhe Florin Mhillaj janë nipat e tij.
Policia e Shtetit gjeti një Audi A4 në Torovicë, në një rrugë dytësore në tokë arë pranë një kanali. Brenda makinës u gjetën dokumente që i përkasin autorëve të dyshuar, ndërsa ajo u sekuestrua për ekspertiza kriminalistike.