Forcat e Policisë së Durrësit kanë vënë në pranga 76-vjeçarin Muhamet Rreshka, pas një ngjarjeje të rëndë të ndodhur në fshatin Agonas të Kavajës. I dyshuari akuzohet se ka goditur për vdekje me mjet prerës (thikë) vëllanë e tij, shtetasin Eqerem Rreshka, 74 vjeç. Autoritetet bënë me dije se konflikti dyshohet se është nxitur nga mosmarrëveshjet e vazhdueshme për pronën.
Sipas njoftimit zyrtar, autori i dyshuar ishte shoqëruar menjëherë pas krimit të ndodhur në mbrëmje, ndërsa masa e arrestit u ekzekutua ditën pasardhëse. Specialistët për Hetimin e Krimeve të Rënda, në bashkëpunim me shërbimet e Komisariatit të Policisë së Kavajës, kanë sekuestruar thikën, e cila është dërguar për ekspertizë si provë materiale.
Në të njëjtën periudhë, policia e Durrësit ka raportuar edhe arrestimin e një 32-vjeçari, D. L., banues në Sukth, i cili dyshohet se gjatë një konflikti ka plagosur me thikë tre persona: Xh. L. (60 vjeç), B. L. (34 vjeç) dhe F. T. (28 vjeç). Të dyja rastet po hetohen nga Prokuroria pranë Gjykatës së Shkallës së Parë të Juridiksionit të Përgjithshëm Durrës për zbardhjen e plotë të rrethanave.