Gjykata e Shkallës së Parë e Juridiksionit të Përgjithshëm Durrës ka vlerësuar të ligjshëm arrestin në flagrancë të shtetasit Muhamet Rreshka dhe ka urdhëruar mbajtjen e tij në paraburgim. Ai akuzohet për veprat penale "vrasje për shkak të marrëdhënieve familjare" dhe "prodhim, mbajtje apo shitje pa leje e armëve të ftohta". Vendimi është marrë nga gjyqtari Elvis Sulejmani në seancën e datës 28 qershor 2026.
Ngjarja ka ndodhur në fshatin Agonas të Kavajës, ku viktima Eqerem Rreshka ka humbur jetën pas një konflikti fizik me të vëllanë. Sipas hetimeve, shkak për përplasjen është bërë një rrugë mes tokave bujqësore, të cilën i dyshuari e pretendonte si të tijën. Viktima, pasi ishte kthyer nga toka me zetor për të marrë dengje bari, është përballur me të vëllanë, i cili i kishte kërkuar të mos e përdorte më atë segment.
Sipas akteve procedurale, gjatë debatit viktima dyshohet se e ka shtyrë të vëllanë me mjetin bujqësor, gjë që ka çuar në përshkallëzimin e konfliktit. Rreth orës 20:30, 76-vjeçari ka përdorur një thikë për të goditur vëllanë e tij, duke i shkaktuar plagë fatale.
Seanca gjyqësore është zhvilluar pa praninë e familjarëve, ndërsa gjykata i ka caktuar një avokat kryesisht të dyshuarit, i cili është baba i tre fëmijëve. Organet e drejtësisë vijojnë hetimet për zbardhjen e plotë të rrethanave të kësaj ngjarjeje.
Përditësime
Gjatë seancës në Gjykatën e Durrësit, 76-vjeçari nga Kavaja, kryeplak i fshatit, kërkoi dënimin me vdekje për veten. Në dëshminë për ngjarjen e datës 25 qershor, ai pretendoi se ka vepruar në kushtet e vetëmbrojtjes pasi viktima e kishte sulmuar me zetor. I pandehuri deklaroi se nuk fliste me vëllanë prej vitesh dhe shprehu pendesë, duke u zotuar se do t'ia dhuronte pasurinë familjes së viktimës nëse do të mund të kthente kohën pas.