Gjykata e Durrësit zhvilloi këtë të mërkurë seancën për vlerësimin e masës së sigurisë ndaj Meklajd Meçajt. 27-vjeçari akuzohet për vrasjen e 60-vjeçarit Rrapush Memolla, ngjarje e ndodhur mbrëmjen e së shtunës, rreth orës 21:50, në lagjen Mollaj të Rrogozhinës.
Sipas hetimeve, krimi ndodhi pas një konflikti të çastit për motive të dobëta. Viktima humbi jetën gjatë rrugës për në spital për shkak të plagëve të rënda nga goditjet me thikë. I akuzuari Meçaj, i cili u shfaq në sallën e gjyqit me dorën e fashuar, pohoi se ka marrë një plagë në dorë gjatë përleshjes.
Në dëshminë e tij, Meçaj mohoi të ketë pasur konflikte personale me viktimën. Ai pretendon se Rrapush Memolla kishte pasur mosmarrëveshje me një kushëri të tij dhe se e kishte provokuar mbrëmjen e ngjarjes duke ndaluar makinën pranë shtëpisë dhe duke përdorur dritat e gjata. 27-vjeçari deklaroi se viktima e kishte goditur i pari me thikë dhe se ai kishte tentuar të mbronte veten.
Gjykata pranoi kërkesën e prokurorisë për caktimin e masës "arrest në burg" deri në përfundim të hetimeve. Rezulton se i pandehuri ka precedentë të mëparshëm penalë në Gjermani.
Përditësime
I akuzuari 27-vjeçar pretendon se ka vepruar në kushtet e mbrojtjes së nevojshme gjatë përplasjes fatale në Rrogozhinë. Gjatë seancës në Gjykatën e Durrësit, ai dëshmoi se viktima e kishte sulmuar i pari me mjet prerës, duke e detyruar të kundërpërgjigjej. Ndërkohë, Prokuroria e Durrësit po heton rrethanat e konfliktit dhe arsyet e mbajtjes së mjeteve prerëse nga të dyja palët.