Një ngjarje e rëndë u regjistrua mbrëmjen e së mërkurës në fshatin Agonas të Kavajës, ku një konflikt mes dy vëllezërve përfundoi në tragjedi.
Sipas njoftimit zyrtar të Policisë, rreth orës 20:30, ndërsa ndodheshin në tokën e tyre bujqësore duke mbledhur bazë ushqimore për blegtorinë, shtetasi Muhamet Rreshka, 76 vjeç, dyshohet se ka goditur me mjet prerës (thikë) vëllanë e tij, Eqerem Rreshka, 74 vjeç.
I dëmtuari u transportua me urgjencë drejt spitalit për të marrë ndihmë mjekësore, por për shkak të plagëve të marra, ai nuk mundi të mbijetojë dhe ndërroi jetë gjatë rrugës.
Shërbimet e Policisë kanë ndërhyrë menjëherë, duke bërë të mundur kapjen dhe shoqërimin e autorit të dyshuar në komisariat për veprime të mëtejshme. Një grup hetimor, nën drejtimin e Prokurorisë, po vijon kryerjen e veprimeve hetimore për zbardhjen e rrethanave dhe dokumentimin e plotë ligjor të ngjarjes.
Përditësime
Sipas burimeve nga Grupi Hetimor, konflikti fatal mes dy vëllezërve dyshohet se ka nisur për motive pronësie. Policia e Kavajës vijon hetimet për zbardhjen e plotë të rrethanave të ngjarjes.