Autoritetet policore në Kurbin kanë zbardhur një ngjarje të rëndë kriminale të ndodhur më 30 prill 2026, ku një e moshuar humbi jetën si pasojë e dhunës. Hetimet e nisura nga Drejtoria Vendore e Policisë Lezhë, në bashkëpunim me Prokurorinë, zbuluan se vdekja e 85-vjeçares Dave Shpani nuk ishte natyrale, por rezultat i goditjeve me thikë.
Në pranga është vënë vajza e viktimës, Violeta Shpani, 57 vjeçe, e cila jetonte në të njëjtën banesë me të ëmën. Sipas të dhënave të policisë, autorja e dyshuar vuan nga probleme të shëndetit mendor. Gjatë operacionit të koduar "Enigma", u sekuestrua mjeti prerës, i dyshuar si arma e krimit, si dhe prova të tjera materiale.
Në lidhje me këtë rast, policia ka referuar materialet për mjeken Anila Lleshi, e cila akuzohet për "Shpërdorim detyre". Ajo dyshohet se kishte plotësuar aktin e vdekjes duke e cilësuar atë si natyrale, pa njoftuar organet ligjzbatuese. Prokuroria vijon punën për dokumentimin e plotë ligjor të ngjarjes dhe verifikimin e çdo personi tjetër që mund të ketë pasur dijeni për rastin.
Përditësime
Hetuesit e Policisë së Shtetit zbardhën vrasjen e 85-vjeçares në Kurbin, pasi ngjarja ishte mbajtur e fshehtë për më shumë se një muaj. Autorët nuk e kishin denoncuar rastin, ndërsa zbardhja e krimit u bë e mundur përmes informacioneve të siguruara në rrugë operative.