Hamza Duraj, 36 vjeç, humbi jetën në fshatin Peshtan Bregas, pjesë e Njësisë Administrative Frakull në Bashkinë Fier, teksa punonte tokat bujqësore me një frezë.
Sipas Drejtoria Vendore e Policisë Fier, ngjarja ndodhi rreth orës 14:40. Në njoftimin zyrtar thuhet: “Në fshatin Peshtan Bregas, shtetasi H. D., 36 vjeç, duke drejtuar një mjet bujqësor (frezë), dyshohet se ka humbur kontrollin mbi drejtimin e mjetit, dhe mjeti bujqësor është rrëzuar duke e zënë poshtë shtetasin H. D., i cili për pasojë ka humbur jetën.”
Familjarët e gjetën trupin e pajetë pasi ai nuk iu përgjigjej thirrjeve telefonike dhe njoftuan shërbimet e emergjencës.
Efektivët e policisë dhe ekipi mjekësor mbërritën në vendngjarje, ku mjekët konstatuan vdekjen. Trupi u transportua në morgun e Spitalit Rajonal Fier për ekspertizë mjeko-ligjore.
Grupi hetimor po punon për zbardhjen e plotë të rrethanave të aksidentit.
Përditësime
Familjarët e 36-vjeçarit Hamza Duraj priten të tërheqin trupin pas ekspertizës mjeko-ligjore për ceremoninë mortore të nesërmen.