Një 40-vjeçar është gjetur i pajetë në banesën e tij në fshatin Portez të Fierit mbrëmjen e së enjtes, më 2 prill 2026, rreth orës 19:15. Viktima, identifikuar si Taulant Halka, punëtor ndërtimi dhe baba i dy fëmijëve, rezulton i qëlluar me armë zjarri në trup.
Paraprakisht dyshohet për vetëvrasje me armë gjahu çifte. Arma, në pronësi të babait të viktimës dhe e mbajtur me leje, u sekuestrua si provë materiale. Grupi hetimor i policisë ndodhet në vendngjarje dhe po kryen veprimet procedurale për zbardhjen e rrethanave.
Sipas burimeve policore, Taulant Halka jetonte në Vlorë, kishte lindur në Korçë dhe ishte larguar drejt shtëpisë së prindërve në Portez për shkak të konflikteve me bashkëshorten, e cila kishte kërkuar urdhër mbrojtje. Ngjarja dyshohet se ka ndodhur në kushte depresive, në dhomën e gjumit.
Autoritetet po mbledhin prova për sqarimin e dinamikës së rastit. Hetimet vazhdojnë.