Një konflikt i çastit ka lënë të plagosur dy shtetas 28-vjeçarë në qytetin e Fierit mbrëmjen e së dielës, më 10 maj 2026.
Rreth orës 23:00, Salla e Komandimit e Drejtorisë Vendore të Policisë Fier mori njoftim se Renato Hoxha dhe Devi Hoxha, të dy 28 vjeç, kishin shkuar në spital për ndihmë mjekësore. Renato Hoxha kishte marrë dëmtime në kokë nga sende të forta, ndërsa Devi Hoxha ishte i lënduar me mjet prerës.
Nga hetimet e kryera nga grupi hetimor i Komisariatit të Policisë Fier, rezultoi se ngjarja erdhi si pasojë e një konflikti të çastit mes disa personave. Specialistët për Hetimin e Krimeve identifikuan një prej autorëve si K. S., 36 vjeç, banues në fshatin Vadhizë të Fierit, shtetas me precedent penal.
Policia e ka shpallur K. S.-në në kërkim. Në bashkëpunim me Prokurorinë, vijon puna për zbardhjen e plotë të rrethanave, si dhe për identifikimin dhe kapjen e shtetasve të tjerë të përfshirë në konflikt. Materialet procedurale i janë referuar Prokurorisë për veprime të mëtejshme.