Një konflikt i dhunshëm është regjistruar gjatë orëve të vona të mbrëmjes së të dielës në zonën e pedonales, pranë plazhit të Durrësit. Si pasojë e përplasjes fizike, tre të rinj kanë mbetur të plagosur me thikë.
Sipas njoftimit të autoriteteve policore, të dëmtuarit janë shtetasit F.B., 19 vjeç, L.C., 20 vjeç dhe U.C., 18 vjeç. Dy prej tyre, 18 dhe 20 vjeç, janë transportuar në Spitalin e Durrësit për të marrë trajtim mjekësor, ndërsa i treti ka pësuar lëndime të lehta dhe nuk ka pasur nevojë për asistencë mjekësore. Fatmirësisht, të tre të rinjtë ndodhen jashtë rrezikut për jetën.
Nga hetimet paraprake rezulton se ngjarja ka ndodhur pas një konflikti të çastit, në të cilin janë përfshirë si autorë të dyshuar shtetasi L.Ç., 19 vjeç, dhe një 15-vjeçar. Të dy këta shtetas janë larguar nga vendngjarja menjëherë pas konfliktit.
Shërbimet e Policisë kanë ngritur pika kontrolli dhe vijojnë operacionin për lokalizimin dhe kapjen e autorëve të dyshuar. Ndërkohë, grupi hetimor, nën drejtimin e Prokurorisë, po punon për dokumentimin e plotë të rrethanave të ngjarjes dhe për identifikimin e një personi tjetër të dyshuar si pjesëmarrës në këtë konflikt.
Përditësime
Sipas burimeve nga Spitali Rajonal i Durrësit, 19-vjeçari F.B. është larguar nga spitali, ndërsa L.C. (20 vjeç) dhe U.C. (18 vjeç) vijojnë të jenë nën kujdes intensiv. Hetimet policore mbi ngjarjen në Lagjen nr. 13 kanë zbardhur se konflikti nisi pas një kontakti fizik aksidental, ku njëri prej autorëve të dyshuar u irritua nga prekja në shpatull duke kërkuar llogari me frazën: 'Pse më preke?'.