Një aksident rrugor me pasojë vdekjen e një shtetasi të mitur është regjistruar më 24 shkurt 2026, rreth orës 11:20, në rrugën “Kastriotët” në Tiranë.
Sipas njoftimit të Policisë së Tiranës, një automjet me drejtues ende të paidentifikuar përplasi një fëmijë rreth 7 vjeç dhe më pas u largua nga vendi i aksidentit. I mituri u dërgua në spital, ku humbi jetën si pasojë e plagëve të marra.
Njoftimi zyrtar i policisë:
«Rreth orës 11:20, në rrugën “Kastriotët”, një automjet me drejtues ende të paidentifikuar ka përplasur një shtetas të mitur rreth 7 vjeç dhe më pas është larguar nga vendi i aksidentit. Si pasojë, i mituri ka humbur jetën në spital».
Grupi hetimor po punon për identifikimin dhe kapjen e drejtuesit të automjetit, si dhe për sqarimin e rrethanave të ngjarjes.
Përditësime
Policia ka arrestuar dy drejtuesit e dyshuar për aksidentin fatal të një 7-vjeçari në Tiranë.
- Tomorr Kostandin Shukulli (55 vjeç) e përplasi fillimisht të miturin, e dërgoi në spital dhe mohoi aksidentin.
- Valentina Koltraku (42 vjeçare) e përplasi më pas.
Autoritetet gjetën dhe sekuestruan dy automjetet. Çështja iu referua Prokurorisë së Tiranës.
Kamerat me pamje të qartë dhe dëshmitarët zbardhin dinamikën e aksidentit. 7-vjeçari po lypte para kur Tomorr Shukulli i dha monedha, të cilat ranë në tokë. Fëmija doli para automjetit për t'i mbledhur sapo u ndez semafori jeshil.
7-vjeçari u ul për të mbledhur të hollat e hedhura nga Tomorr Shukuli, shoferi i parë, i cili nuk e pa fëmijën sepse ishte ulur. Një mjet i dytë përplasi trupin e tij pas përplasjes fillestare, sipas hetimit të Policisë së Tiranës.