Një aksident me pasojë vdekjen është regjistruar mbrëmjen e së mërkurës, më 10 qershor 2026, në zonën e Laknasit në Tiranë. Përplasja ndodhi rreth orës 20:30 në rrugën “Nënë Tereza”, ku një automjet është përplasur me një motomjet.
Sipas njoftimit zyrtar të Policisë së Tiranës, automjeti drejtohej nga shtetasi Egnisjan Vraja, 20 vjeç, ndërsa motomjeti drejtohej nga shtetasi Luan Gaci, 48 vjeç. Si pasojë e përplasjes, drejtuesi i motomjetit ka gjetur vdekjen në vendngjarje.
Shërbimet e policisë kanë mbërritur menjëherë në vendin e ngjarjes dhe kanë shoqëruar drejtuesin 20-vjeçar në komisariat për kryerjen e veprimeve të mëtejshme procedurale. Një grup hetimor po punon për zbardhjen e plotë të rrethanave dhe shkaqeve të aksidentit.