Një aksident i rëndë ka ndodhur në kryeqytet, në rrugën “Llazi Miho”, ku një i mitur 10-vjeçar është goditur radhazi nga dy mjete. Sipas njoftimit zyrtar të Policisë së Tiranës, fëmija është përplasur fillimisht nga një motomjet që drejtohej nga një 27-vjeçar, i cili nuk dispononte leje drejtimi. Pas kësaj goditjeje, i mituri dyshohet se është goditur edhe nga një automjet i dytë, i drejtuar nga një 47-vjeçar.
Pas përplasjes, drejtuesi i automjetit është larguar nga vendi i aksidentit. Megjithatë, si rezultat i veprimeve hetimore dhe kërkimore të kryera nga shërbimet e policisë, 47-vjeçari është identifikuar dhe kapur. Ndaj tij ka nisur procedimi penal në gjendje të lirë. Në të njëjtën kohë, efektivët e policisë kanë arrestuar në flagrancë 27-vjeçarin që drejtonte motomjetin pa patentë.
Fëmija i aksidentuar është dërguar me urgjencë në spital për të marrë ndihmën e nevojshme mjekësore. Burime nga bluzat e bardha konfirmojnë se i mituri ndodhet jashtë rrezikut për jetën. Materialet procedurale i janë referuar Prokurorisë për veprime të mëtejshme ligjore, ndërsa policia vijon punën për zbardhjen e plotë të rrethanave të kësaj ngjarjeje.