Një aksident rrugor ka ndodhur në Bashkinë Finiq, pranë zonës turistike të Syrit të Kaltër, ku një mjet tip motor ka dalë nga rruga. Si pasojë, dy personat që ndodheshin në mjet kanë rënë në një humnerë me thellësi rreth 15 metra.
Sipas informacioneve paraprake, njëri nga të lënduarit është shtetas i huaj. Në vendngjarje kanë mbërritur shërbimet e MZSH-së, forcat e Policisë dhe ekipet e Urgjencës Mjekësore, të cilat mundësuan nxjerrjen e të dëmtuarve nga humnera. Qytetarët janë transportuar për në Spitalin e Sarandës për të marrë ndihmën e nevojshme mjekësore. Ata kanë pësuar lëndime të lehta dhe ndodhen jashtë rrezikut për jetën.
Autoritetet policore po punojnë për zbardhjen e rrethanave të plota të ngjarjes. Paraprakisht dyshohet se humbja e kontrollit të mjetit gjatë lëvizjes në aksin rrugor ka qenë shkaku i daljes së motorit nga rruga.
Përditësime
Autoritetet konfirmuan se mjeti i përfshirë në aksident pranë Syrit të Kaltër ishte një motor me katër rrota (ATV). Dy shtetas të huaj, të cilët pësuan lëndime gjatë rënies në humnerë, morën ndihmën e parë nga kalimtarët para mbërritjes së ekipeve të emergjencës. Pas marrjes së trajtimit mjekësor, të dy të lënduarit janë larguar nga spitali.